%اسبـــــــــــــــــــــوع%
ــــــــــــــــــــــــــــــــــــــــــــــــــ ــــ
أسبوع مر !! ولاوصل منك مرسـال
ياقوّ قلبك كيف تقطعنـي أسبـوع ؟!
الجوع كافر ! وانت ماترحـم الحـال
وانا عليك من الولـه ميـت ٍ جـوع
ياللي غيابك صعب يطري على البال
تركتني ضايـق وحايـر ومفجـوع
ماكنّـي الا: شايـب ٍ فاقـد عيـال
وماكنك الا: محرم ٍ حق مشـروع !!
يفوع لك قلبـي ليـا مـر الاطـلال
ياليت مالي قلـب يشتـاق ويفـوع
حسبي عليك شلون قطعـت الامـال
بآآآموت لاصار الامل فيك مقطـوع
ياصاحبـي ماكـل نــزّال رحّــال
انت الحيّا من وين مارحت متبوع !!
نسياني لـزول ٍ بالاعمـاق يختـال
اصعب على صاحبك من حبة الكـوع
لو الثمن في شوفتـك عمـر رجـال
كان الثمن من يوم ماغبت مدفوع !!
ولو القدر ما تـم قولـه ليـا قـال
ماضاق صدر ولا انحنى راس مرفوع
ياصاحبي عشقتنـي فعـل وخصـال
وانا عشقتك شعر واحساس وطبوع
وشلون تتركني كذا لا اشهب الـلال
وقدّام عيني تجف ينبوع .. ينبوع !!
وانا عشانك جيـت والغيـم همّـال
اسيّـل الوديـان واداحـم جـمـوع
ماردّنـي عنـك سواليـف عــذال
تزعل عليّ ربوع وتقـدّر ربـوع !!
كان المهم اعيشك جنـون ووصـال
ويكون لي كلمه ولي راي مسمـوع
واليوم ضاقت بي من الجـال للجـال
فرقاك تقصم ظهـر وتحـز وتلـوع
لو جيت شفت الحال ماسرّك الحـال
في غيبتك ضايق وحايـر ومفجـوع
هذا غياب اسبوع وشلون لـو طـال
طالبك .. لايطوّل غيابك عن اسبوع
.............................................